Luk 4 | ASO | STEP | Ido' Izesu'ni nene O'moso'mi Sikalahu' ne'mo lulou' lemo mino gono dadi'mo do zau' o-davo Zodani nene hulo misubo ga'meta vavo a'mida O'moso'mi Sikalahu' aza gamene foti (40) ne'mine ele'mizo nomonivo Satani ne'mo emengu' moloka' moloka' ogo minine'. A'mine gameneu' nene Izesu' aza velesi namo minine' nenako a'mine gamene foti (40) nene ogo vo osu' nolivo ga'na naba helo minine'.

Luke 4

Izesu'ni Satani'mo Emengu' Molani' Gamazi Gizine'

(Mataio' 4:1-11; Maleko' 1:12-13)

1 Ido' Izesu'ni nene O'moso'mi Sikalahu' ne'mo lulou' lemo mino gono dadi'mo do zau' o-davo Zodani nene hulo misubo ga'meta vavo a'mida O'moso'mi Sikalahu' aza gamene foti (40) ne'mine ele'mizo nomonivo Satani ne'mo emengu' moloka' moloka' ogo minine'. A'mine gameneu' nene Izesu' aza velesi namo minine' nenako a'mine gamene foti (40) nene ogo vo osu' nolivo ga'na naba helo minine'. 3 Ne'mine neivo Satani aza ogo Izesu'ni ti' lo lo-imine': Gaza nene O'moso'mi gipele noo ma nene gaza geheni mevoomu' lanivo naline' inite' beleti lolo' ozo lovo. 4 Ne'mine lavo Izesu' ti' lo lo-imine': O'ove. Mono' godolou' gamazi ma ti' li gizi nizani' ma neive:

Evene' minevo' alevote nene noso' nitekukovo' nomive.
Ne'mine li gizi nizani' nenako nemu' nene gei' laine' ne'mine nene mo amolosuve.

5 Ido' neloti' nene aza golo malo' Izesu'ni ele'mizo dize mino misubou' misubou' minani' evene' zuho ato ato' muki' misubo'ningu' misubo'ningu' minani' nene lite' lo elebizo osu' lo 6 ti' lo lo-imine': A'mine evene' zuho ato ato' mukito' gizebo oga' amuzo nesi ido' engi' guve'ine vaa' neine' nesi nene neni' inite' lolo' ogo neine' nenako evene' ma emelove lo geleloni' nene zaho nolihe a'mine ve nene ha emelodo' o nouve. 7 Ido' a'mine amuzo emelove lo giluve nene ha emelodo' o nouvoni' nenako gaza gubi' ize nemo obuvoka hize nemeline' a'mine inite' nene gemekuvo muki' nene gei' inite' lolo' oloseive. 8 Ne'mine lavo Izesu' aza ti' lo lo-imine': Mono' godolou' ti' li gizi nizani' ma neive:

Laza Guvetesi ve O'moso ei' hamo' nene opo'ni lo gubi' ize emo minelesune.
Ee, ei' hamokovo' nene gelekele' o-do minelesune.
Ne'mine li gizi nizani' nenako nemu' nene gaza laine' ne'mine amolosuve.

9 Ido' aza gohi ele'mizo Zelusalemi ebeku' vo mono' numuno naba ha'na ha'na minine' ne'mi gololo' ele'mizo dize mino ti' lo lo-imine': Mono' godolou' ti' li gizi nizani' ma neive:

O'moso'mo gei' gizebo i-gidilizangumu'
angelo've gono gamazi lo-ngedeleseive.
Ido' ma nene: Gizenga gehenilo' gebele gulutilinguti' angelo' nete alete mili di hozi li-gidilisave li gizi nizani' ve. Ido' a'mine gamazi lido' igi ne'mine i-gidilisaze. Gaza lamine' O'moso'mi gipele noo ma nene meloti' oluto aka'melo' izevo. 12 Ne'mine lavo Izesu' ti' lo lo-imine': Ne neiha mono' godolou' gamazi ma ti' lo neive:

Lingine Guvetinesi ve O'moso nene golo izamilo.
Ne'mine lo-leme neine' ma nenako geze nolaine' nene O'moso golo izaa' noloseinako ne'mine amolosuve. 13 Ne'mine lavo Satani aza emengu' molo osu' lo gamene ma emengu' molalosa hulo-do vine' ve.

Izesu' nGalilaia Misubou' Gono Api' Ogo Dani' Gamazi Gizine'.

(Mataio' 4:12-17; Maleko' 1:14-15)

14 Ido' Izesu' nene O'moso'mi Sikalahuli'mo amuzo emo hize ele' o-davo nGalilaia misubouko do tine' molo vine'. Tine' molo vavo a'mida nene ei' guvele ne'mo buu lo nGalilaia misubo gahevela ebe' mukiku' nene mone osu' line'. 15 A'mine nGalilaia misubou' nene mono' numuno miningu' miningu' mono' apize ngeme ngeme' ivo evene' muki' di naba i-di geke' li-dani' ve.

Nasalete Aleve Izesu'ni Vasa Izi-dani' Gamazi Gizine'

(Mataio' 13:53-58; Maleko' 6:1-6)

16 Ne'mine ikevo Izesu' aza mino naba ine' ebe've Nasaletela vo hetelo aza oga' idi'mine ogo holise' gamene ogavo mono' numungu' mono' gili nizangu' nene dizine'. Dizo mito' neivo mono' godolouti' polohetelite gizani' gamazi linge ma gililizani' gamene ogavo Izesu' aza a'mine mono' gato ngemelesa ote neivo 17 mono' numudo' gizebo ve aza polohete Isaia' gizine' mono' buku nene do emavo buku nene do patelo gamazi ma ti' lo gizine' minine' nene do soto' ine':

18 Guvelesi ve'mo neni' nene eze gonolo' nele'mize molani' nenako
ne'mo ei' Sikalahu've nene nenita omo neive.
Ee, Guvelesi ve aza gono gamazi ti' lo lo-nimine':
Gaza evene' goho' gahali' ne'mine minani' nene
neni' gamazi'ne lamine' nene lo soto' o-ngemeline lo
nele'mize molani' ve.
Ido' biluvaliti a'ningu' galapuso ve ne'mine gili minave nene
kuluhizi vilizani' akatine nene mo idise ngolo' lave lo
lo soto' o-ngemeline lo nele'mize molani' ve.
Ido' ve'ine likive ne'mine minavemu' nene
gohi ve'ine ningilizani' aka nene mo ngolo' lave lo
lo soto' soto' ogo lo-ngemeline lo nimiseline' ve.
Ido' goboni mala' mala' i-ngidavo geni initeli'mi lulou' minave nene
gaza a'minguti' hulo heta o-ngedosa
19 Guvelesi ve'mo ninge lamine' o-ngedeline' gamene nene
mo alitave lo lo soto' o-ngemeline lo nimiseline' ve.
20 Ido' a'mine gamazi nene mo gato ngemo buku nene do gango mono' numudo' gizebo ve nene do emo mito' minavo a'mine mono' numungu' minave muki' nene mono' lo-lemelihe li vonu' bili minani' ve. 21 Ne'mine igi nizavo aza gamazi api' ogo ti' lo lo-ngimine': A'mine mono' godolouti' gamazi mene lingine nigilavo idise a'mene gihile noizive. 22 Ne'mine lavo ingine di naba i-di gamazi lamine' ei' veleuti' line' nemu' nene ve'ine gahava nomivo mini ti' li lani': Aza nene ha Zosehe' gipele nenako ne'mine gamazi nene nadosa nolive. Olo. 23 Ne'mine likevo aza aneza gamaziuti' ti' lo lo-ngimine': Naza giluvoni' lingine ti' li li-nimilisa gilani' ve: Dotazo, gaza evene' ato' do lamine' o-ngedaa' naine' ne'mino gei' okongasi do lamine' ovo. Nemu' nene a'mine gamazilo' e'meto gaza Kahanaumi numuda do soto' ane lavo gilune' inite' nene gaza gei' numunga ebeka melokisi do soto' ovo. 24 Ido' ne'mine lo ti' lo lo-ngimine': Naza lamineto' ti' lo lo-lengemeloze. Gililo. O'moso'mi veleti' gamazi laa' unive polohete muki' leli' numudela leli' zuho gihile nete leli' polohetelite lunido' nene ma gili limisa'mave. 25 Nemu' nene naza lamineto' ma ti' lo nolo-lingimuve: Isilaele' misubou' mene gozopota polohete Elia' minine' gameneu' nene O'moso'mo goline izeline' aka hize tilavo kilisimasi setohamosi hapusi ogo novivo goline izamivo a'mine misubo mukiku' nene ga'na naba soto' ogavo minani' gamenela nene Isilaele' vene' engikuti' nene vene' gevono' muki' minani'za 26 O'moso'mo Elia'ni nene hize ele' o-ngedelingumu' engi' mukita imiselamo asi Sidoni misubou' numuno ebe' ma gulive Zalehati nela heta ato' vene' gevono' minida imiselavo vine' ve. 27 Ido' Isilaele' misubou' mene polohete Elisa' minine' gameneu' nene ganadise gizi dave vai' minani'za polohete Elisa' aza a'minguti' hamokisi ma do lamine' o-ngedamo asi heta ato' ve Silia misubouti' ve Naamani'ni nene do lamine' o-dine' ve. 28 Ne'mine lavo a'mine mono' numungu' mini line' gamazi gilave muki' nene aza lelita gono dalido' lisihe' amune nolive li gili ngizebolo' goloso molani' ve. 29 Ne'mine ogavo oti Izesu'ni nene ehuso' ahasa' igi numuno ebe'ine ne'mi heta di vi a'mine numu'ine ebe'ine minine' gololoti' nene aveseu' ehuso' i hulilisa ani'za 30 aza vovo'ninguti' olovo' ogo vo mala vine' ve.

Izesu' Aza Kahanaumi Numuda Sikalahu' Goloso Lulou' Minive Ma Do Lamine' O-dine' Gamazi Gizine'.

(Maleko' 1:21-28)

31 Ido' Izesu' aza nGalilaia misubou' numuno ebe' ma Kahanaumi nela lemo vine'. A'mida vo neivo holise' gamene ogavo mono' apize ngemo minine'. 32 Ne'mino neivo mono' gamazi lo-ngimivo gilave ingine Izesu' aza nene gamazi evene' malite lado' do molo lamo asi gamazi ne'mi meleho ne'mine mino lo-ngimidi'mo vo'ine vavo upuho' ani'. 33 Ne'mine igi nizavo a'mine engi' mono' numungu' nene Satanilati' sikalahu' goloso lulou' minive ma minidi'mo geke' geke' lo ti' lo line': 34 Agae, Nasalete ve Izesuvo, leli' nonida mene nanimu' ane. Gaza do goloso o-ledelesa abe. Geze nene naza mo ningo gele nouve ma nene nane. Gaza nene O'mosolati' kegeso lamine' minanive ma nene nane. 35 Ne'mine line'za Izesu' aza elemo ti' lo lo-imine': Gamazi lamo zegene' oko mino evene' hulo-do lemo ogo vozo. Lavo sikalahu' goloso ne'mo evene' nene evene' mukiliti vovo'ningu' nene ehuso' ogo do ongo-do lulouti' lemo ogo vine'za evene' nene do goloso o-damine' ve. 36 Ne'mine ogo lemo vavo evene' ingine ningi upuho' igi ti' li li gele ha gele ani': Mene nani'mine gamazi live. Aza nene mo gavele ve mino atoli'mine amuzo do mino lavo sikalahu' goloso netesi eze gamazi gili dii evene' neti lu'ninguti' nesi limi vaa' naanako eze gamazi've nene amuzo'vesi minine' atoli'mine gamazi neive. 37 Li likevo Izesu' guvele ne'mo a'mine ebe' ne'mi gahevela numuno ebe' mini'mi monani' mukiku' nene buu lo mone osu' line'.

Izesu' Simoni Elenahi Izelehinesi Ido' Evene' Mukikisi Do Lamine' O-ngidine' Gamazi Gizine'

(Mataio' 8:14-17; Maleko' 1:29-34)

38 Ne'mine ogavo Izesu' aza oto mono' numuno hulo lemo voo Simoni Petolo' numu'veu' vo dizine'. A'mingu' nene Simoni elenahi izeleho nene oko'nou' olo' naba goloso lavo neivo a'mine vene' nene do lamine' o-delibo li Izesuda lani'. 39 Ne'mine likevo aza ogo vene' neida ote mino a'mine oko'nou' olo' lo minine' inite' nene mate-delive lo amuzonga lo-davo oko'nou' olo' line' nene osu' lo-dine'. Ne'mine ogavo vene' aza lite' lo oto ngele'mize lamine' ogo nasahili' o-ngedo minine' ve.

40 Ido' nivenga' ho' nolimivo evene' muki' ingine engi' zuhouti' inite' ato ato' gizi dave minani' nene Izesu' neida ngele'mizi ikevo Izesu' aza a'mine inite' gizi dave muki' nene oko'nido' do geleka' geleka' ogo do lamine' o-ngidine' ve. 41 Ne'mine noo-ngedo evene' mukiliti lu'ninguti' sikalahu' goloso minani' nesi ngimiselo do nohulo-ngidivo a'mine sikalahu' goloso nete ti' li lani': Gaza nene O'moso'mi gipele ma nene nane. Ne'mine li evene' lu'ninguti' huli-ngidi limi nivavo a'mine sikalahu' goloso nete Izesu' nene O'moso'mo do ngu' izelive lo do kegese-do imiselelesa live ma ne neive li gili nizani' nenako nemu' nene Izesu' aza sikalahu' goloso ingine gamazi lami zegeni limi vilizave lo ngelemine'.

Izesu' Aza Zuda Veti Misubou' Numudo' Namado' Mono' Lo-ngeme'mo Monine' Gamazi Gizine'

(Maleko' 1:35-39)

42 Ido' go' lavo nedenga' Izesu' aza numunguti' lemo evene' nizamada guvisela vo minine'. Vo neivo evene' muki' ingine ezemu' vise' i' moni moni neida igi hulo-ngedo vamilive li lani'za 43 aza ti' lo lo-ngimine': O'moso'mo evene' eze gizebou' vi hilalizani' aka'mi gamazi lamine' nene lo soto' soto' ogo evene' muki' lo-ngemeline lo nimiseline' nenako naza nene numuno ebe' mala malasi vo a'mine gono nene daloni' o neive. 44 Aza ne'mine lo Zuda veti misubou' mono' numuno miningu' miningu' nene dizo mono' lo-ngeme ngeme' o'mo mono minine' ve.